LGN 20/01 Mooliiɓe rewankooɓe mbaɗii seppo hannde 19 janvier e nder Ndakaaru ngam hollude mette mum e dartin’gol nawtugol maɓɓe. Molliiɓe Muritani heddiiɓe e nder Senegaal mbeltaaki. Hannde, ɓe ngarii seppude e yeeso HCR e gardagol diɗɗal pelle mooliiɓe rewo e nder leydi Senegaal.“HCR korompii, Senegaal korompii…..ko fotde amen min naamnii” nanaama e mbeddaaji catiiɗi ñiiɓirde HCR hakkunde waktuuji 1103 subaka haa waktuuji 1200 naange e hoore. Seppo ngoo ɓaaƴii gite laamu leydi ndi kañum e HCR, so ɓe neldude polis yoo riiwtu woɗɗtin seppooɓe ɓe e sara ñiiɓirde HCR. Ko e nder duko e gulaaji keewɗi hakkunde maɓɓe e polis, HCR felliti jaɓɓaade ɓe. Ko e nder ɗuum ɓe nanondiri e neldude njoyo e maɓɓe ngam yiyondirde e hoohooɓe HCR ngam yeewtidde e maɓɓe e caɗeele kootol maɓɓe. Ina jeyaa e ɓeen Njoyo, Aljumaa Siisoko, Mammadu Wan, Abdullaay (gummiiɗo daande mayo ngam tawtoreede) e ɗiɗo woɗɓe.

E ko goomu mooliiɓe oo holliri 5200 mooliiɗo ina heddii e fonngo mayo ina fadi nawteede kono laamu Muritani saltiima nawtude e dow nanondiral hakkunde maɓɓe e laamu Senegaal. Goomu oo kadi woytiima HCR won’de hootɓe ɓee ne ngonaani e jam sabu feccere e maɓɓe ko rusaaɓe e gure ɗo ɓe njeyanooka etee ɓe ndañaani toon leydi ndema wolla fotde maɓɓe.E oo sahaa kootol mooliiɓe ko ko teeŋi sabu laamu Muritani hollitii dartinii kootol, etee HCR haalaani hay huunde ko ina luutndii ko laamu Muritani nguu haali ko.

Binndol Abu Gay, www.mbiimi.com